Nostra Lenga – Cabra

Episode 35 : Cabra

Anem, vos presenti ma cabra qu’a pè e bana, e banilhon e barba al menton !

La cabra d’aur seriá un tresaur que los Sarrasins amaguèron al pè d’un monument de Provença. A Arle, cresián que la Cabra d’aur passava cada matin dins los primièrs rais del solelh sul puèg de Montmajor. A Laudun, contan que la nuèit de Sant Joan a mièjanuèit un gorg (gouffre) prigond s’entredobrís dins la montanha de Sant Joan justament e que ne sortís supèrba la Cabra d’aur. A Vernègas tanben dins Bocas de Ròse (les Bouches-du-Rhône), tenon una bauma (caverne) de la Cabra d’aur. Los païsans de la Vau-clusa fintan la montanha de la cabra que lor i servís de cadran solar. Quand marca l’ora de dinnar, dison : la cabra beu !

E se los pichons lengadocians pausan la question « cabra, ont es lo lop ? » es pas a una cabra mas a una manta religiosa.

E doblidètz pas que, quand los francimands passan du coq à l’âne, nosaus los Occitans, sautam de la cabra al perièr !

(FR) Dans la chronique en occitan “Nòstra lenga es un tresaur”, Roxane nous partage des explications sur des mots occitans, sur la base du dictionnaire provençal-français « Lou Tresor dóu Felibrige », composé par l’écrivain de langue provençale et prix Nobel de littérature Frédéric Mistral. Loin d’être centré sur la variante provençale de l’occitan, cet ouvrage regroupe l’intégralité des langues d’oc sous l’appellation « langue provençale » alors usitée au XIXème siècle. Chroniques écrites par Alan Roch, et animées par Roxane Sourbier (alias Roxitanie, sur Instagram).

(ÒC) Dins la cronica en occitan “Nòstra lenga es un tresaur”, Roxane nos parteja d’explicacions sus de mots occitans, sus la basa del diccionari provençal-francés « Lou Tresor dóu Felibrige », compilat per l’escrivan en lenga provençala e laureat del prèmi Nobel de literatura Frédéric Mistral. Luènh d’èsser focalizat unicament sus la varianta provençala de l’occitan, aquela òbra englòba totas las lengas d’òc jol tèrme de « lenga provençala », coma èra alara coneguda al sègle XIX. Cronicas escrichas per Alan Roch, e presentadas per Roxane Sourbier (alias Roxitanie, sus Instagram).